Ռուսաստանի Կենտրոնական բանկը դարձել է ոսկու ամենախոշոր վաճառողը

Հունվարին Ռուսաստանի Կենտրոնական բանկը գլխավորել է ոսկու վաճառքի համաշխարհային ցուցակը։ Այս մասին հայտնում է ՌԻԱ Նովոստին՝ հղում անելով Ոսկու համաշխարհային խորհրդի (World Gold Council, WGC) տվյալներին։ Տարեսկզբին ռուսական կարգավորիչը վաճառել է 9 տոննա ոսկի՝ դառնալով ամենախոշոր վաճառողը։

Համեմատության համար նշվում է, որ նույն ժամանակահատվածում մի շարք կենտրոնական բանկեր ընդհանուր առմամբ գնել են ընդամենը 5 տոննա ոսկի, ինչը զգալիորեն պակաս է նախորդ տարվա 27 տոննայից։ Վաճառքների ծավալներով երկրորդ տեղում է Բուլղարիան՝ 1,9 տոննա, իսկ երրորդ հորիզոնականը կիսել են Ղազախստանն ու Ղրղզստանը՝ յուրաքանչյուրը 1,1 տոննա վաճառքով։

Միևնույն ժամանակ գնորդների թվում առաջատար է Թուրքիան՝ 10,2 տոննա, որին հաջորդում են Ուզբեկստանը (8,7 տոննա), Մալայզիան (3,4 տոննա), Չեխիան (1,7 տոննա) և Ինդոնեզիան (1,5 տոննա)։ Վերլուծաբանները նշում են, որ Մերձավոր Արևելքում լարվածության աճի պայմաններում ոսկին շարունակում է մնալ «ապաստանային ակտիվ», և գները կարող են հասնել նոր պատմական առավելագույնների։