«Իրենք են խառնաշփոթը ստեղծել». Չինաստանը ճնշում է գործադրում Իրանի վրա՝ պահանջելով ապահովել նավթի արտահանումը

Չինաստանը ոչ հրապարակային բանակցություններում ճնշում է գործադրում Իրանի վրա՝ պահանջելով երաշխավորել նավթի և հեղուկացված բնական գազի անվտանգ փոխադրումը Օրմուզի նեղուցով և զերծ մնալ հարվածներից տարածաշրջանի էներգետիկ ենթակառուցվածքներին։ Այս մասին հայտնում է Bloomberg-ը՝ նշելով, որ Պեկինի համար նեղուցի անխափան աշխատանքը առաջնային նշանակություն ունի, քանի որ այնտեղով անցնում է համաշխարհային նավթային մատակարարումների շուրջ 20 տոկոսը։ Չինաստանը մնում է Իրանի խոշորագույն գնորդը՝ ձեռք բերելով նրա նավթի արտահանման մոտ 90 տոկոսը։

Փորձագետ Իվան Բուբնովի գնահատմամբ՝ չնայած տնտեսական կախվածությանը, Իրանը հակամարտությունում կշարունակի հետապնդել իր ռազմավարական նպատակները՝ անկախ Պեկինի ճնշումից։ Նրա խոսքով՝ Թեհրանի համար ներկայում անվտանգային և քաղաքական հարցերը գերակա են տնտեսական հաշվարկներից։ Միևնույն ժամանակ Չինաստանը պաշտոնապես հանդես է գալիս լարվածության դադարեցման և բանակցային գործընթացի օգտին՝ ընդգծելով միջազգային իրավունքի պահպանման անհրաժեշտությունը։

Վերջին օրերին Օրմուզի նեղուցում նավագնացությունը կտրուկ նվազել է, իսկ մի շարք տանկերներ վնասվել են հարվածների հետևանքով, ինչը բարձրացրել է նավթի գներն ու փոխադրումների ապահովագրական վճարները։ Վերլուծաբանների կարծիքով՝ Պեկինի զգուշավոր հռետորաբանությունը պայմանավորված է էներգետիկ անվտանգության հարցերով, իսկ Չինաստանը կարող է փորձել հանդես գալ որպես միջնորդ՝ հակամարտության դիվանագիտական կարգավորման գործընթացում։