Իսպանիայի ԱԳ նախարարը պատասխանել է Թրամփի սպառնալիքներին՝ պահանջելով հարգել Մադրիդին

Իսպանիայի արտաքին գործերի նախարար Խոսե Մանուել Ալբարեսը արձագանքել է ԱՄՆ նախագահ Դոնալդ Թրամփի հայտարարություններին՝ ընդգծելով, որ Իսպանիան ինքնիշխան պետություն է և արժանի է իր դաշնակիցների հարգանքին։ Այդ մասին նա հայտարարել է RTVE հեռուստառադիոընկերությանը տված հարցազրույցում։

Նախարարի խոսքով՝ Իսպանիան ինքնուրույն է կայացնում իր քաղաքական որոշումները և ակնկալում է, որ դաշնակից երկրները կհարգեն այդ ընտրությունը։ Նա նաև նշել է, որ Իսպանիան աշխարհի ամենահին ազգերից մեկն է և արժանի է համապատասխան վերաբերմունքի միջազգային հարաբերություններում։

Ալբարեսը հավելել է, որ Մադրիդը շարունակում է մնալ ԱՄՆ-ի կարևոր գործընկերն ու բարեկամ պետությունը։ Նրա խոսքով՝ Վաշինգտոնը առևտրային շահույթ ունի Իսպանիայի հետ հարաբերություններում, իսկ Մադրիդը ակտիվորեն գնում է ամերիկյան հեղուկացված բնական գազ։ Ավելի վաղ Դոնալդ Թրամփը սպառնացել էր դադարեցնել առևտուրը Իսպանիայի հետ՝ պաշտպանական ծախսերը չավելացնելու պատճառով։