Ռուսաստանի ԱԳՆ-ն Զելենսկու հայտարարությունները Մերձավոր Արևելքին օգնելու մասին անվանել է «բլեֆ»

Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան քննադատել է Ուկրաինայի նախագահ Վլադիմիր Զելենսկու հայտարարությունը, ըստ որի Կիևը պատրաստ է ռազմական մասնագետներ ուղարկել Մերձավոր Արևելք։ Նրա խոսքով՝ նման հայտարարությունները իրական հիմք չունեն և ուղղված են միայն քաղաքական քարոզչությանը։

Զախարովան նշել է, որ Ուկրաինան ինքն է մշտապես դիմում իր դաշնակիցներին՝ լրացուցիչ հակաօդային պաշտպանության համակարգեր ստանալու խնդրանքով, ուստի, նրա գնահատմամբ, Կիևը պարզապես ի վիճակի չէ որևէ իրական օգնություն ցուցաբերել այլ երկրներին։ Դիվանագետը այդ հայտարարությունները բնութագրել է որպես «բլեֆ» և Զելենսկու անձնական PR քայլ։

Ավելի վաղ Զելենսկին հայտարարել էր, որ Ուկրաինան պատրաստ է աջակցել Մերձավոր Արևելքի երկրներին Իրանի անօդաչու սարքերի դեմ պայքարում և անհրաժեշտության դեպքում ուղարկել իր լավագույն ռազմական մասնագետներին Պարսից ծոցի երկրներ։ Նա նշել էր, որ դա հնարավոր կլինի, եթե տարածաշրջանի առաջնորդները համոզեն Ռուսաստանի նախագահ Վլադիմիր Պուտինին համաձայնել մեկամսյա հրադադարի Ուկրաինայի հետ։