Որքա՞ն ժամանակ կարող է Իսրայելը դիմանալ Իրանի դեմ երկարատև պատերազմում

Իսրայելի և Իրանի միջև հակամարտության խորացման ֆոնին Իսրայելի և ԱՄՆ-ի ղեկավարները չեն բացառել, որ գործողությունները կարող են շարունակվել շաբաթներ։ Սակայն Al Jazeera-ն գրում է, որ եթե Վաշինգտոնը վստահ է երկարատև պատերազմի իր կարողությունների հարցում, ապա Իսրայելի համար նման սցենարը կարող է դառնալ ավելի թանկ՝ թե՛ ռազմական, թե՛ տնտեսական ու սոցիալական իմաստով՝ հաշվի առնելով վերջին տարիների բազմաճակատ լարվածությունը և պահեստազորայինների լայնածավալ մոբիլիզացիան։

Հոդվածում նշվում է, որ Իսրայելը արդեն մի քանի օր դիմագրավում է Իրանից եկող հրթիռային ու անօդաչու հարվածների ալիքներ՝ օդային տագնապների հաճախակի ազդանշաններով, դպրոցների փակմամբ և արտակարգ ծառայությունների ծանրաբեռնվածությամբ։ Հայֆան ու Թել Ավիվը հայտնվել են շարունակական հարվածների պայմաններում, իսկ հասարակությունը՝ որը սովոր չէ հենց իր տարածքում նման մասշտաբի պատերազմական ռեժիմի, ստիպված է պարբերաբար ապաստարաններ իջնել։

Միևնույն ժամանակ հրապարակումը շեշտում է, որ հասարակական աջակցությունը պատերազմին այժմ բարձր է, և քաղաքական դաշտի մեծ մասը համախմբվել է կառավարության շուրջ։ Որոշ փորձագետներ դա կապում են իսրայելական հասարակության հետագա ռադիկալացման ռիսկի հետ՝ ընդգծելով, որ նույնիսկ պատերազմը քննադատողները հիմնականում խոսում են այն «կարճ պահելու» մասին, մինչդեռ պատերազմի ավարտի պահը միշտ չէ, որ Իսրայելի վերահսկողության տակ է։