Իրանյան պատերազմի ֆոնին Չինաստանի արդյունաբերությունը բախվում է նոր տնտեսական ռիսկերի

Չինաստանի գործարանային ակտիվության ցուցանիշները փետրվարին հակասական պատկեր են ցույց տվել․ պետական խոշոր ձեռնարկությունները շարունակում են բախվել թույլ ներքին պահանջարկի խնդիրներին, մինչդեռ մասնավոր հատվածում արտահանման աճ է գրանցվել։ Reuters-ի փոխանցմամբ՝ Չինաստանի պաշտոնական PMI արդյունաբերական ինդեքսը նվազել է մինչև 49.0, ինչը 4 ամսվա նվազագույն ցուցանիշն է և շարունակում է մնալ տնտեսական աճը բաժանող 50 միավորի սահմանագծից ցածր։

Միաժամանակ մասնավոր հարցումների տվյալներով՝ արտադրական ոլորտում որոշ վերականգնում է նկատվել։ S&P Global-ի հաշվարկած RatingDog արտադրական PMI-ը բարձրացել է մինչև 52.1, ինչը վկայում է արտահանման պատվերների աճի մասին։ Սակայն տնտեսագետները նշում են, որ Չինաստանի տնտեսությունը շարունակում է կախված մնալ արտաքին պահանջարկից, քանի որ ներքին սպառումը դեռևս թույլ է մնում։

Վերլուծաբանների կարծիքով՝ նոր ռիսկեր է ստեղծում նաև ԱՄՆ–Իրան հակամարտությունը, որը կարող է խաթարել համաշխարհային մատակարարման շղթաները։ Հորմուզի նեղուցի փակման դեպքում, որով անցնում է միջազգային առևտրի կարևոր մասը, լուրջ խնդիրներ կարող են առաջանալ հատկապես Չինաստանի արտահանման համար։ Տնտեսագետները կանխատեսում են, որ եթե իրավիճակը երկարաձգվի, Պեկինը ստիպված կլինի նոր տնտեսական խթանիչ միջոցներ կիրառել՝ տնտեսության աճը պահպանելու համար։