Ռուսաստանում մեկնաբանել են Իրանի խոցված Як-130 ինքնաթիռի մասին հայտարարությունները

Ռուսական աղբյուրները մեկնաբանել են այն տեղեկությունները, ըստ որոնց Իսրայելի F-35I Adir կործանիչը խոցել է Իրանի ռազմաօդային ուժերի Як-130 ինքնաթիռը։ «Военная хроника» տելեգրամյան ալիքը նշել է, որ Як-130-ը հիմնականում ուսումնական-մարտական ինքնաթիռ է և նախատեսված չէ ժամանակակից կործանիչների դեմ լիարժեք օդային մարտ վարելու համար։

Հրապարակման մեջ նշվում է, որ նման ինքնաթիռը հաճախ անվանում են «թռչող ուսումնական սեղան»։ Այն չունի հզոր ռադար և սովորաբար զինված է Ռ-73 հրթիռներով, որոնք արդյունավետ են մինչև մոտ 20 կիլոմետր հեռավորության վրա։ Այդ պատճառով, ըստ աղբյուրի, նման ինքնաթիռի խոցումը չի կարող համարվել մեծ ռազմական ձեռքբերում։

Հաղորդվում է նաև, որ Իրանը օգտագործում է Як-130 և МиГ-29А ինքնաթիռները հիմնականում անօդաչու սարքերի և թևավոր հրթիռների որսման համար։ Վերլուծաբանների կարծիքով՝ իրավիճակը այլ կլիներ, եթե իսրայելական F-35-ը բախվեր ավելի ծանր կործանիչների, օրինակ՝ չինական J-10C կամ ռուսական Су-30СМ2 մոդելների հետ։