Կանխվել է Ռուսաստանից ավելի քան մեկ միլիարդ ռուբլու զինամթերքի արտահանումը

Ռուսաստանի ՆԳՆ և ԱԴԾ աշխատակիցները կանխել են երկրից շուրջ 75 միլիոն միավոր զինամթերքի ապօրինի արտահանումը, որի արժեքը գերազանցում է մեկ միլիարդ ռուբլին։ Այդ մասին հայտարարել է Ռուսաստանի ներքին գործերի նախարար Վլադիմիր Կոլոկոլցևը ՆԳՆ կոլեգիայի նիստում։

Քննչական տվյալներով՝ հանցավոր խմբի անդամները արտասահմանյան ընկերությունների անունից պայմանագրեր էին կնքել ռուսական պաշտպանական ձեռնարկության հետ՝ հայտարարելով, թե զինամթերքը նախատեսված է երրորդ երկրներ արտահանելու համար։ Սակայն իրականում նրանք պատրաստվում էին ծովային ճանապարհով այն ուղարկել մի երկիր, որի նկատմամբ ՄԱԿ-ի Անվտանգության խորհուրդը արգելել է բոլոր տեսակի զենքի մատակարարումը։

Հաղորդվում է, որ խմբավորումը նախկինում ևս նման սխեմա էր կիրառել․ 2020 թվականին նույն մեթոդով ապօրինի արտահանվել էր մոտ 9 միլիոն փամփուշտ, որոնց արժեքը կազմել էր ավելի քան 243 միլիոն ռուբլի։ Ռուսաստանի ՆԳՆ քննչական դեպարտամենտը հարուցել է քրեական գործեր, և գործի բոլոր կասկածյալները կալանավորվել են։