Գնացեք սեփական դարդը լացեք, եկել եք դպրոցների դարդն եք լացում․ Փաշինյան

Ձեր հարցի բանալի բառը «համացանցն» է, հերիք է էլի, ձև անենք, այս մասին ԱԺ-կառավարություն հարցուպատասխանի ընթացքում ասել է վարչապետ Նիկոլ Փաշինյանը՝ անդրադառնալով «Հայաստան» խմբակցության պատգամավոր Լիլիթ Գալստյանի հարցին, որ դպրոցներում, նաև բանակում բռնության դեպքերն աճում են։ «Եթե նախկինում դպրոցականների շրջանում այդ հարաբերությունների մասին Տիկ-Տոկում, Ինստագրամում չի եղել, դա չի նշանակում, որ դրանք չեն եղել։ Հիմա հարևանը հարևանի հետ շքամուտքում վիճում է, երրորդ հարևանի գործն է, որ առաջինը գցի Տիկ-Տոկ, որ առաջինը ինքը դիտում հավաքի»,- ասել է Փաշինյանը։

Միաժամանակ խոստովանել է, որ խնդիրը կա, պատճառը, ըստ նրա, քրեական ենթամշակույթն է, որը «մշակույթ է դարձել»։ «Մեզանում երեխաների հետ հարաբերվելու ձև կա՝ կամ ինքը խփի, կամ մենք խփենք... 18 տարի մեր երիտասարդությանը լիցքավորում ենք, հետո ուղարկում բանակ, հետո գնում մի լեյտենանտի, մայորի կամ գնդապետի դատում, ասում՝ ինչի՞ չես այս խնդիրը լուծել»,- ասել է Փաշինյանը։

Գալստյանը նշեց, որ ակնկալում էր քաղաքական պատասխանատուի արձագանք, մինչդեռ ստացավ «բեսեդկայի զրույց» հիշեցնող կենցաղային մակարդակի պատասխան։ «Քանի ՀՀ-ում կա կուսակցություն, որտեղ զենքի վրա երդվելով են ընդունվում կուսակցություն և որտեղ սեփական անդամներին գնդակահարելը սովորական երևույթ է, գնացեք սեփական դարդը լացեք, եկել եք դպրոցների դարդն եք լացում։ Քաղաքական պատասխանատվությունից մեկն այն է, որ ձեր նման կուսակցությունների նման կուսակցություններ չլինեն՝ որպես հանցավորության դեմ պայքարի ոչ էական, բայց կարևոր մաս»,-ասել է Փաշինյանը։