Այսօր Վազգեն Սարգսյանի ծննդյան օրն է

Այսօր  Հայաստանի ազգային հերոս, պետական և ռազմական գործիչ Վազգեն Սարգսյանի ծննդյան օրՆ Է։ Նա հայոց նորագույն պատմության ամենանշանակալի դեմքերից էր, ով մեծ դեր ունեցավ Հայաստանի անկախության պաշտպանության և պետականության ամրապնդման գործում։ Վազգեն Սարգսյանը ծնվել է 1959 թվականի մարտի 5-ին, Արարատի մարզի Արարատ գյուղում։

Երիտասարդ տարիներին զբաղվել է գրականությամբ, աշխատել է որպես ուսուցիչ և լրագրող։ Սակայն Հայաստանի համար ծանր ժամանակաշրջանում նա կանգնեց ժողովրդի կողքին և դարձավ ազգային շարժման ակտիվ մասնակից։

Հայաստանի անկախության առաջին տարիներին Վազգեն Սարգսյանը կարևոր դեր ունեցավ հայկական բանակի ձևավորման գործում։ Նրա նախաձեռնությամբ և ղեկավարությամբ ստեղծվեց հայկական բանակը, որն ապահովեց երկրի անվտանգությունը և պաշտպանեց հայրենիքը պատերազմական ծանր պայմաններում։

Վազգեն Սարգսյանը տարբեր տարիների զբաղեցրել է Հայաստանի պաշտպանության նախարարի, ինչպես նաև վարչապետի պաշտոնները։ Նրա գործունեությունը մեծապես կապված էր պետականության ամրապնդման, բանակի զարգացման և երկրի անվտանգության ապահովման հետ։

Ցավոք, 1999 թվականի հոկտեմբերի 27-ին Հայաստանի Ազգային ժողովում տեղի ունեցած ահաբեկչական հարձակման ժամանակ Վազգեն Սարգսյանը սպանվեց։ Այդ ողբերգական օրը խլեց Հայաստանի մի շարք պետական գործիչների կյանքը և մեծ ցավ պատճառեց ողջ ժողովրդին։ 

Այսօր Վազգեն Սարգսյանի անունը կապված է հայրենիքի պաշտպանությամբ, ուժեղ բանակով և անկախ Հայաստանի կայացման պատմությամբ։ Նա հայ ժողովրդի հիշողության մեջ մնացել է որպես առաջնորդ, ով իր կյանքը նվիրեց հայրենիքի ծառայությանը։