ՆԱՏՕ-ի գլխավոր քարտուղարը ողջունել է Ֆրանսիայի միջուկային զսպման նախաձեռնությունը

ՆԱՏՕ-ի գլխավոր քարտուղար Մարկ Ռուտտեն կարևորել է Ֆրանսիայի նախաձեռնությունը Եվրոպայում միջուկային զսպման ոլորտում՝ նշելով, որ այն կնպաստի դաշինքի անվտանգության և պաշտպանության ամրապնդմանը, հայտնում է Sputnik International-ը։

Ֆրանսիայի նախագահ Էմանուել Մակրոնը երկուշաբթի հայտարարել էր, որ Ֆրանսիան մտնում է «առաջադեմ միջուկային զսպման» փուլ, ներկայացնելով ծրագրեր՝ միջուկային զինամթերքի պահուստը ընդլայնելու և Եվրոպական երկրների մասնակցությամբ համատեղ զսպման զորավարժություններ անցկացնելու նպատակով։ Նախագահը նշել է, որ Մեծ Բրիտանիան, Գերմանիան, Լեհաստանը, Նիդեռլանդները, Բելգիան, Հունաստանը, Շվեդիան և Դանիան համաձայնություն են տվել միանալ միջուկային համագործակցության երկխոսությանը։

«Սա դրական քայլ է Ֆրանսիայի կողմից, քանի որ կնպաստի ՆԱՏՕ-ի ընդհանուր միջուկային դիրքի ամրապնդմանը։ ՆԱՏՕ-ի բոլոր անդամները ճանաչում են, որ ԱՄՆ-ի միջուկային զսպման համակարգը հանդիսանում է դաշինքի տարածքների ազատության և անվտանգության վերջնական երաշխավորը։ Միաժամանակ, Ֆրանսիայի ակտիվ մասնակցությունը և համագործակցությունը այլ երկրների հետ կուժեղացնի ՆԱՏՕ-ի ընդհանուր միջուկային զսպման կարողությունները», – հայտարարել է Ռուտտեն Newsmax լրատվամիջոցին։