Եվրոպայում Apple-ի նոր նոթբուքերը կվաճառվեն առանց լիցքավորիչի

Apple ընկերությունը որոշել է Եվրոպայի մի շարք երկրներում նոր նոթբուքերը վաճառել առանց լիցքավորիչի։ Այս մասին հայտնում է MacRumors-ը՝ նշելով, որ որոշումը վերաբերում է MacBook Neo, MacBook Air և MacBook Pro մոդելներին։

Եվրամիության երկրներում և Մեծ Բրիտանիայում գնորդները նոթբուք գնելիս տուփի մեջ լիցքավորիչ չեն ստանա։ Այսինքն՝ Գերմանիայում, Ֆրանսիայում, Իտալիայում, Իսպանիայում և այլ երկրներում օգտատերերը ստիպված կլինեն լիցքավորիչը ձեռք բերել առանձին՝ Apple-ից կամ այլ վաճառողներից։ Նշվում է, որ Apple-ը նման քայլ արդեն կատարել էր 2025 թվականին՝ MacBook Pro մոդելի թողարկման ժամանակ։

Միևնույն ժամանակ աշխարհի մյուս տարածաշրջաններում նոթբուքերը շարունակում են վաճառվել լիցքավորիչով։ Օրինակ՝ MacBook Neo-ի տուփում ներառված է 20 Վտ հզորությամբ USB-C լիցքավորիչ, իսկ 16 դյույմանոց MacBook Pro-ի դեպքում՝ 140 Վտ ադապտեր։ Apple-ը հիշեցրել է նաև, որ դեռ 2020 թվականից iPhone-ների տուփերում այլևս չի ներառում լիցքավորիչ՝ թողնելով միայն մալուխը։