Ռուսաստանում ահազանգ են հնչեցրել Զելենսկուն նմանվող կասկածելի տղամարդու մասին

Ռուսաստանի Ռյազանի մարզում անհանգստություն են հայտնել մի տղամարդու վերաբերյալ, որը արտաքինով շատ նման է Ուկրաինայի նախագահ Վլադիմիր Զելենսկուն և, ըստ տեղական հոգևորականի, զբաղվում է կասկածելի գործունեությամբ։ Այդ մասին «ВКонтакте» սոցիալական ցանցում գրել է տեղական քահանա Դմիտրի Ֆետիսովը։

Քահանայի խոսքով՝ տղամարդը շրջում է տարբեր եկեղեցիներով և հավատացյալներին հրավիրում է մասնակցել մասնավոր բնակարանում անցկացվող  «ուղղափառ կինոակումբի» հանդիպումներին։ Ֆետիսովը նշել է, որ այդ անձը իրեն ներկայացնում է Վլադիմիր անունով։

Հոգևորականը զգուշացրել է, որ նման գործողությունները կարող են կապված լինել կեղծ ուղղափառ աղանդ ստեղծելու փորձի հետ և կոչ է արել մարդկանց զգոն լինել։