Հայկական Երուսաղեմում ծառայությունն օրեցօր բարդանում է, կանչվածները շատ են, ընտրյալները՝ քիչ (տեսանյութ)

Ջիվան Հակոբյանը «Արաբո» ջոկատի փոխհրամանատարն է եղել, մասնակցել է պատերազմներին ու բանակաշինությանը։ Այսօր նա մարտիկ-հոգևորական է և ծառայում է Երուսաղեմում։ 60-ն անց դպիրը, հայկական տարածքները պաշտպանելուց հետո, հիմա էլ հայկական սրբավայրերն է պաշտպանում օտար ազգերի ու այլադավանների ոտնձգություններից։ Երուսաղեմում ծառայությունն օրեցօր դժվարանում է։

Աշխատանքը շատ է և կարևոր, այնինչ զինվոր-ծառայողները սակավաթիվ են։ Արդեն 2 տարի է՝ Երուսաղեմի Հին քաղաքի հայկական թաղամասի կալվածքների շուրջ ստեղծված խայտառակ դատական վեճերին ավելացել է նաև Կովերի պարտեզի խնդիրը։

Մյուս կողմից՝ մեր երկրի ներսում շարունակվում է Հայ Առաքելական եկեղեցու և Կաթողիկոսության դեմ քայքայիչ պայքարը, որին ատամները կրճտացնելով ամուր դիմադրում է նաև Երուսաղեմի հայ հոգևոր դասը։ Հաճախ ամբողջ վանական համալիրում այսօր ծառայում են ընդամենը 1–2 հոգևորական

։ Սրբությունները պաշտպանելիս հայ հոգևորականները հաճախ ստիպված են լինում դիմակայել 1-ը 10-ի դեմ՝ անհավասար պայմաններում, ընդ որում՝ նաև ուժի գործադրմամբ։

Ղևոնդ վարդապետ Հովհաննիսյանի օրվա ռեժիմը համարյա ամբողջովին նույնանում է հոգևորականի ծառայության հետ, բայց իր խառնվածքի ու կերտած անցյալի պես հաճախ օրվա կեսին զինվոր է, իսկ մյուս կեսին՝ բարձր պատվախնդրության տեր հոգևորական։

Գիշեր ու զօր նա կատարում է հսկայական ֆիզիկական և հոգևոր-գիտական աշխատանք։ Եվ այսօր էլ, աշխարհի ծանր ու դժնդակ պատերազմների, մուսուլման և քրիստոնյա աշխարհի հալածանքների միջև, հիշում ենք Աստվածաշնչյան ամենաակտուալ ուղերձը՝ «Որովհետև կանչվածները շատ են, իսկ ընտրյալները՝ քիչ»։