Վոլոդինը կոչ է արել ռուսաստանցիներին հրաժարվել օտար բառերի օգտագործումից

Ռուսաստանի Պետդումայի նախագահ Վյաչեսլավ Վոլոդինը կոչ է արել երկրի քաղաքացիներին հնարավորության դեպքում չօգտագործել օտար բառեր և նախապատվություն տալ ռուսերենին։ Այդ մասին նա գրել է իր Telegram ալիքում։

Վոլոդինի խոսքով՝ ռուսերեն լեզուն միավորում է հասարակությունը և հանդիսանում է երկրի մշակութային ինքնության կարևոր մասը։ Նա նշել է, որ անհրաժեշտ է խուսափել օտար լեզուներից փոխառությունների անհարկի կիրառությունից այն դեպքերում, երբ ռուսերենում արդեն գոյություն ունեն համապատասխան բառեր։

Ռուսաստանում արդեն ուժի մեջ են մտել նաև նոր սահմանափակումներ․ մարտի 1-ից սկսած ցուցանակները, տեղեկատվական վահանակները և ցուցիչները պետք է լինեն ռուսերեն լեզվով։ Նույն պահանջը վերաբերում է նաև բնակելի համալիրների և շինարարական նախագծերի անվանումներին գովազդային նյութերում։