Ալիևը սպառնացել է Իրանին․ Ադրբեջանի բանակը բերվել է առավելագույն մարտական պատրաստության

Ադրբեջանի նախագահ Իլհամ Ալիևը «ահաբեկչական ակտ» է որակել, ենթադրաբար, Իրանից անօդաչուներով Նախիջևանի տարածքը թիրախավորելու գործողությունը։ Մարտի 5-ին Անվտանգության խորհրդի նիստի ժամանակ Ալիևը զինված ուժերին հրահանգել է պատրաստվել պատասխան գործողությունների։

«Իրանը գնդակոծել է Նախիջևանի Ինքնավար Հանրապետության տարածքը՝ օգտագործելով անօդաչու թռչող սարքեր։ Թիրախները եղել են քաղաքացիական օբյեկտները։ Նախիջևանի միջազգային օդանավակայանը, դրա տերմինալի շենքը, դպրոցը և այլ ուղղություններ ենթարկվել են նենգ գնդակոծության Իրանի կողմից»,- հայտարարել է Ալիևը։

Նա հավելել է, որ Բաքուն պահանջում է անհապաղ ներողություն խնդրել և մեղավորներին քրեական պատասխանատվության ենթարկել։

«Իրանցի պաշտոնյաները պետք է ադրբեջանական կողմին բացատրություններ տան, ներողություն խնդրեն, իսկ այս ահաբեկչության մեջ մեղավորները՝ ենթարկվեն քրեական պատասխանատվության»,- ասել է Ալիևը։

Ալիևն իր ելույթում ընդգծել է, որ սա առաջին դեպքը չէ, երբ Թեհրանը թիրախավորում է Ադրբեջանը՝ հիշեցնելով Թեհրանում Ադրբեջանի դեսպանատան վրա կատարված հարձակումը։ Նա պնդել է, որ այդ գործողությունները համակարգվում են Իրանի պետական բարձր մակարդակով։

Անվտանգության խորհրդի նիստի ժամանակ Ալիևը հայտարարել է, որ ադրբեջանական բանակը բերվել է առավելագույն մարտական պատրաստության և պատրաստ է ուժ կիրառել։

«Զինված ուժերին հանձնարարական է տրված նախապատրաստել և իրականացնել պատասխան միջոցառումներ։ Այս անազնիվ մարդիկ, ովքեր մեր դեմ իրականացրել են այս ահաբեկչությունը, կզղջան դրա համար։ Թող չփորձեն մեր ուժը»,- ասել է Ադրբեջանի նախագահը։