Ադրբեջանը սկսել է Իրանից իր դիվանագետների տարհանումը

Ադրբեջանը սկսել է Իրանում աշխատող իր դիվանագետների տարհանման գործընթացը։ Այս մասին հայտարարել է երկրի արտաքին գործերի նախարար Ջեյհուն Բայրամովը՝ նշելով, որ գործընթացը վերաբերում է ինչպես Թեհրանում գտնվող Ադրբեջանի դեսպանատանը, այնպես էլ Թավրիզում գործող գլխավոր հյուպատոսությանը։

Բայրամովի խոսքով՝ ներկայում իրականացվում են համապատասխան կազմակերպչական աշխատանքներ՝ դիվանագիտական անձնակազմի անվտանգ տեղափոխումն ապահովելու համար։ Նա չի մանրամասնել տարհանման պատճառները, սակայն ընդգծել է, որ գործընթացը արդեն սկսված է և շարունակվում է։

Ավելի վաղ Ադրբեջանի նախագահ Իլհամ Ալիևը հայտարարել էր, որ երկրի զինված ուժերը, պետական սահմանապահ ծառայությունը և հատուկ ստորաբաժանումները բերվել են «թիվ մեկ մոբիլիզացիայի» վիճակի։ Մարտի 5-ին նաև հաղորդվել էր, որ երկու իրանական անօդաչու սարք հարձակվել են Նախիջևանի օդանավակայանի վրա, ինչը Ալիևը Անվտանգության խորհրդի նիստում անվանել էր ահաբեկչական գործողություն և դրա համար մեղադրել Իրանի իշխանություններին։