Բրիթնի Սփիրսը ձերբակալվել է

Ամերիկացի պոպ աստղ Բրիթնի Սփիրսը ձերբակալվել է ալկոհոլի և թմրամիջոցների ազդեցության տակ մեքենա վարելու կասկածանքով՝ Կալիֆոռնիայի իր տան մոտ։ Այս մասին հայտնել են իրավապահ մարմինները։ Չորեքշաբթի երեկոյան ոստիկանությունը հաղորդում է ստացել, որ սև BMW 430i մեքենան արագ և անկանոն կերպով շարժվում է։ 44-ամյա երգչուհին մեքենայում եղել է միայնակ։ Նա դուրս է եկել մայրուղուց և կանգնեցրել մեքենան։ Ոստիկանների խոսքով՝ նա ունեցել է թունավորման նշաններ, անցել է սթափության մի շարք թեստեր, ինչից հետո ձերբակալվել է և տեղափոխվել Ventura County Jail։ Քիմիական թեստերի արդյունքները դեռ սպասվում են, գործը շարունակում է քննվել։

Երգչուհու ներկայացուցիչը հայտարարել է, որ տեղի ունեցածը «ցավալի և անթույլատրելի միջադեպ է»։ Նրա խոսքով՝ Սփիրսը պատրաստվում է հետևել օրենքի պահանջներին և անհրաժեշտ քայլեր ձեռնարկել իր կյանքում փոփոխություններ իրականացնելու համար։ Նրա դատական նիստը նշանակված է մայիսի 4-ին։

Սփիրսը ծնվել է Միսիսիպիում և մեծացել Լուիզիանայում։ Նա համաշխարհային հայտնիություն ձեռք է բերել դեռահաս տարիքում՝ մասնակցելով The Mickey Mouse Club հեռուստաշոուին, իսկ ավելի ուշ դարձել 1990-ականների և 2000-ականների ամենահայտնի փոփ աստղերից մեկը։ Նրա ամենահայտնի հիթերից են՝ «Baby One More Time», «Oops!… I Did It Again», «Toxic»։