Զախարովա․ Կիևի «ֆիքսված գաղափարը» միջուկային զենքն է

Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան հայտարարել է, որ Ուկրաինայի իշխանությունների համար միջուկային զենք ունենալը դարձել է «ֆիքսված գաղափար»։ Այս մասին նա ասել է «РИА Новости»-ին տված հարցազրույցում՝ անդրադառնալով Կիևի ռազմական և քաղաքական դիրքորոշմանը։

Զախարովայի խոսքով՝ նման հայտարարություններ հնչել են դեռևս Ուկրաինայում ռազմական գործողությունների սկզբնական շրջանում, երբ երկրի նախագահ Վլադիմիր Զելենսկին ակնարկել էր, որ Կիևը կարող էր ունենալ միջուկային զենք։ Դիվանագետը նշել է, որ այդ հայտարարությունները վկայում են Ուկրաինայի ղեկավարության մտադրությունների մասին։

Նրա գնահատմամբ՝ Ուկրաինայի իշխանությունների գործողությունները ցույց են տալիս, որ միջուկային զենքը նրանց անհրաժեշտ է ոչ թե զսպման նպատակով, այլ կիրառման համար։ Ավելի վաղ նաև հաղորդվել էր, որ Ֆրանսիան և Մեծ Բրիտանիան կարող են աջակցել Ուկրաինային միջուկային կարողությունների ձեռքբերման հարցում՝ այն ներկայացնելով որպես Կիևի սեփական մշակում։