Կիևում մոտ 2700 բնակելի շենք մնացել է առանց ջեռուցման

Ուկրաինայի մայրաքաղաք Կիևում ավելի քան երկու հազար բնակելի շենք մնացել է առանց ջեռուցման՝ կարևոր ենթակառուցվածքի վնասման հետևանքով։ Այս մասին Telegram-ում հայտնել է քաղաքի քաղաքապետ Վիտալի Կլիչկոն։

Քաղաքապետի խոսքով՝ նախորդ գիշեր վնասված ենթակառուցվածքային օբյեկտի պատճառով ջեռուցումից զրկվել է 1905 շենք՝ Գոլոսեևսկի, Դնեպրովսկի, Պեչերսկի և Սոլոմենսկի շրջաններում։ Այժմ քաղաքային ծառայությունները փորձում են վերականգնել ջերմամատակարարումը։

Կլիչկոն նշել է, որ ընդհանուր առմամբ քաղաքում առանց ջեռուցման մնացած շենքերի թիվը հասնում է մոտ 2700-ի։ Այդ ցուցանիշը ներառում է նաև Դառնիցկի և Դնեպրովսկի շրջանների որոշ շենքեր, որտեղ ջեռուցումը դեռ հնարավոր չէ վերականգնել Դառնիցկայա ջերմաէլեկտրակայանի ծանր վնասումների պատճառով։