Reuters․ ԱՄՆ-ը Շրի Լանկային կոչ է անում չվերադարձնել խորտակված իրանական նավի անձնակազմին

ԱՄՆ-ը ճնշում է գործադրում Շրի Լանկայի վրա՝ պահանջելով չվերադարձնել Իրանի քաղաքացիներին, որոնք փրկվել են վերջերս խորտակված իրանական ռազմական նավից։ Այս մասին հայտնում է Reuters-ը՝ հղում անելով ԱՄՆ Պետդեպարտամենտի ներքին հեռագրին։

Տեղեկությունների համաձայն՝ ԱՄՆ սուզանավը Հնդկական օվկիանոսում, Շրի Լանկայի Գալլե նավահանգստից մոտ 19 ծովային մղոն հեռավորության վրա, խորտակել է իրանական IRIS Dena ռազմական նավը, որի հետևանքով զոհվել են տասնյակ նավաստիներ։ Միաժամանակ Շրի Լանկայի իշխանությունները ընդունել են նաև երկրորդ իրանական նավի՝ IRIS Booshehr-ի 208 անդամից բաղկացած անձնակազմը, որը հայտնվել էր երկրի տնտեսական գոտում։

Reuters-ի տվյալներով՝ ԱՄՆ-ը պահանջել է, որ Շրի Լանկան չարտաքսի ոչ IRIS Booshehr-ի անձնակազմին, ոչ էլ IRIS Dena նավից փրկված 32 նավաստիներին և սահմանափակի Իրանի հնարավոր փորձերը նրանց օգտագործելու քարոզչական նպատակներով։ Շրի Լանկայի նախագահ Անուրա Կումարա Դիսանայակեն, սակայն, հայտարարել է, որ երկիրը «հումանիտար պարտավորություն» ունի օգնություն ցուցաբերելու նավաստիներին։