Դոհայից Մոսկվա մեկնեց առաջին չվերթը Իրանի դեմ ռազմական գործողությունների մեկնարկից հետո

Կատարի մայրաքաղաք Դոհայից Մոսկվա է մեկնել առաջին ավիաչվերթը այն պահից ի վեր, երբ սկսվել էին ԱՄՆ-ի և Իսրայելի ռազմական գործողությունները Իրանի դեմ։ Այս մասին հայտնում է ՏԱՍՍ-ը՝ հղում անելով Մոսկվայի Շերեմետևո օդանավակայանին։

Հաղորդվում է, որ Qatar Airways ավիաընկերության ինքնաթիռը թռիչք է կատարել Կատարի Համադ միջազգային օդանավակայանից և նախատեսվում է, որ այն Մոսկվա կհասնի Մոսկվայի ժամանակով ժամը 18:00-ին։ Կատարի օդային տարածքը փակվել էր փետրվարի 28-ին՝ Իրանի դեմ սկսված ռազմական գործողություններից հետո, և մինչև մարտի 7-ը թռիչքները ամբողջությամբ դադարեցված էին։

Ռուսաստանի տուրօպերատորների ասոցիացիայի փոխնախագահ Արթուր Մուրադյանի խոսքով՝ Պարսից ծոցի մի շարք երկրների օդային տարածքի ժամանակավոր փակումը ազդել է ոչ միայն ուղիղ չվերթների, այլև տարանցիկ ուղևորների վրա։ Շատ ռուսաստանցիներ այդ երկրները օգտագործում էին որպես տարանցիկ հանգույցներ դեպի Ասիա և Հնդկական օվկիանոսի կղզիներ, սակայն այժմ չեն կարողանում վերադառնալ տուն։ Նշվում է նաև, որ Իրանի, Իրաքի, Բահրեյնի և Քուվեյթի օդային տարածքները շարունակում են փակ մնալ, մինչդեռ Կատարում և ԱՄԷ-ում թռիչքները թույլատրվում են սահմանափակ ձևով։