Բահրեյնի նավթային ընկերությունը ֆորս-մաժոր է հայտարարել՝ նավթավերամշակման գործարանում տեղի ունեցած պայթյուններից հետո

Բահրեյնի պետական նավթային ընկերությունը՝ Bapco Energies BSC-ն, ֆորս-մաժոր է հայտարարել իր նավթավերամշակման գործարանում տեղի ունեցած պայթյուններից հետո։ Այդ մասին հայտնում է BNA գործակալությունը՝ նշելով, որ միջադեպը կապված է Մերձավոր Արևելքում շարունակվող տարածաշրջանային լարվածության հետ։

Ընկերության տվյալներով՝ գործարանի աշխատանքը խաթարվել է ինչպես տարածաշրջանում շարունակվող հակամարտության, այնպես էլ վերջերս տեղի ունեցած հարձակման հետևանքով։ Միևնույն ժամանակ Bapco-ն վստահեցրել է, որ նախօրոք իրականացված միջոցառումների շնորհիվ երկրի ներքին շուկայի պահանջարկը ամբողջությամբ ապահովված է, և մատակարարումների շարունակականությունը վտանգված չէ։

Մարտի 9-ին նմանատիպ միջադեպ է գրանցվել նաև ԱՄԷ-ի Ֆուջեյրա նավթարդյունահանող էմիրությունում, որտեղ անօդաչու թռչող սարքերի բեկորների ընկնելու հետևանքով հրդեհ է բռնկվել նավթավերամշակման գործարանում։ Տուժածներ չեն եղել։ Ֆուջեյրայի նավահանգիստը համարվում է աշխարհում նավթի պահեստավորման և բեռնափոխադրման խոշորագույն կենտրոններից մեկը և մի քանի օր առաջ արդեն ենթարկվել էր հրթիռային հարձակման։