Սթարմերը հայտնել է, թե ինչպես կարող է Իրանի շուրջ ստեղծված իրավիճակը ազդել Մեծ Բրիտանիայի վրա

Մեծ Բրիտանիայի վարչապետ Քիր Սթարմերը խոստովանել է, որ Մերձավոր Արևելքում իրավիճակի սրացումը, հավանաբար, կազդի Մեծ Բրիտանիայում կյանքի արժեքի վրա։

«Մենք անցկացնում ենք միջգերատեսչական վերլուծություն, գնահատում ենք ռիսկերը, մոնիթորինգ ենք անում և քննարկում ենք համատեղ քայլեր մեր միջազգային գործընկերների հետ՝ մարդկանց և բիզնեսների վրա ազդեցությունը նվազագույնի հասցնելու համար։

Որքան երկար սա շարունակվի, այնքան մեծ կլինի մեր տնտեսության, յուրաքանչյուր մարդու և յուրաքանչյուր բիզնեսի վրա հնարավոր ազդեցությունը», - ասել է Սթարմերը Լոնդոնի սոցիալական կենտրոն այցելության ժամանակ։ Հայտարարությունը ուղիղ հեռարձակվել է տեղական հեռուստաալիքներով։

Ավելի վաղ Մեծ Բրիտանիայի խոշորագույն ավտոսպասարկման ընկերություններից մեկը՝ RAC-ը, հայտնել էր, որ Մեծ Բրիտանիայում դիզելային վառելիքի գինը արդեն աճել է ավելի քան 4%-ով՝ Իրանի շուրջ իրավիճակի սրացման սկսվելուց ի վեր։ Նույն ժամանակահատվածում բենզինի գները բարձրացել են գրեթե 3%-ով։