ՆԱՏՕ-ն Թուրքիայում խոցել է Իրանից արձակված բալիստիկ հրթիռ

ՆԱՏՕ-ի հակաօդային և հակահրթիռային պաշտպանության համակարգերը Թուրքիայի օդային տարածքում խոցել են Իրանից արձակված բալիստիկ հրթիռ։ Այդ մասին հայտարարել է Թուրքիայի պաշտպանության նախարարությունը, հաղորդում է Reuters-ը։

Պաշտպանության նախարարության տվյալներով՝ հրթիռը մտել էր Թուրքիայի օդային տարածք, սակայն արագ հայտնաբերվել և ոչնչացվել է ՆԱՏՕ-ի պաշտպանական համակարգերի կողմից, որոնք տեղակայված են Արևելյան Միջերկրականում։ Հրթիռի բեկորների մի մասը ընկել է Գազիանթեփ նահանգի անմարդաբնակ տարածքներում, սակայն միջադեպի հետևանքով զոհեր կամ վիրավորներ չեն գրանցվել։

Թուրքիայի իշխանությունները հայտարարել են, որ մեծ կարևորություն են տալիս տարածաշրջանում կայունությանը և հարևան երկրների հետ հարաբերություններին, սակայն ընդգծել են, որ Անկարան առանց հապաղելու կձեռնարկի բոլոր անհրաժեշտ քայլերը երկրի տարածքի և օդային տարածքի նկատմամբ ցանկացած սպառնալիքի դեպքում։ Ավելի վաղ Թուրքիայի արտաքին գործերի նախարար Հաքան Ֆիդանը այս միջադեպի կապակցությամբ բողոք էր հայտնել Իրանի արտաքին գործերի նախարար Աբբաս Արաղչիին։