Մերձավոր Արևելքում ավիաչվերթների դադարեցումը ստիպել է երկրներին սկսել քաղաքացիների տարհանումը

Մերձավոր Արևելքում ավիաչվերթների մի մասի դադարեցումը՝ Իրանի դեմ ԱՄՆ-ի և Իսրայելի հարվածներից հետո սրված հակամարտության պատճառով, հազարավոր օտարերկրյա քաղաքացիների թողել է տարածաշրջանում։ Այդ իրավիճակը ստիպել է բազմաթիվ պետությունների սկսել իրենց քաղաքացիների տարհանումը հատուկ չվերթներով։ Այդ մասին հայտնում է Reuters գործակալությունը։

Եվրոպական միությունը հայտարարել է, որ ԵՄ քաղաքացիական պաշտպանության մեխանիզմի շրջանակում արդեն կազմակերպվել է ավելի քան 42 տարհանման չվերթ, որոնց միջոցով Եվրոպա է վերադարձվել 4100-ից ավելի մարդ։ Միաժամանակ մի շարք երկրներ՝ այդ թվում Ավստրիան, Բուլղարիան, Գերմանիան, Հունգարիան, Իտալիան, Իսպանիան և Շվեդիան, իրականացրել են կամ ծրագրում են իրականացնել լրացուցիչ տարհանման չվերթներ Մերձավոր Արևելքի տարբեր երկրներից։

Տարհանման գործողություններ են իրականացնում նաև այլ պետություններ։ Մեծ Բրիտանիան և Ֆրանսիան կազմակերպում են հատուկ չարտերային չվերթներ, Նիդերլանդները պատրաստվում է օգտագործել նույնիսկ ռազմական ավիացիան, իսկ Սինգապուրը նախատեսում է օդուժի ինքնաթիռներ ուղարկել տարածաշրջան։ Միջազգային տարհանումների անհրաժեշտությունը առաջացել է այն բանից հետո, երբ տարածաշրջանի մի շարք երկրներում օդային տարածքը փակվել է կամ սահմանափակվել է թռիչքների իրականացումը։