Իրանը շարունակում է սխալ քայլեր ձեռնարկել՝ չնայած նախազգուշացումներին․ Էրդողան

Պետք չէ ձեռնարկվեն այնպիսի քայլեր, որոնք «ստվեր կնետեն Իրանի հետ մեր հազարամյակների բարիդրացիական և եղբայրական կապերի վրա կամ կվնասեն մեր ազգին», - երկուշաբթի՝ մարտի 9-ին, հայտարարել է Թուրքիայի նախագահ Ռեջեփ Թայիփ Էրդողանը՝ անդրադառնալով միջադեպին՝ կապված Իրանի կողմից Թուրքիայի ուղղությամբ արձակված հրթիռի հետ։

Նա նշել է, որ Իրանի հարձակումներն Ադրբեջանի և Պարսից ծոցի երկրների վրա անընդունելի են։

«Չնայած մեր անկեղծ նախազգուշացումներին՝ շարունակում են ձեռնարկվել ծայրահեղ սխալ և սադրիչ քայլեր, որոնք բարդացնում են Թուրքիայի բարեկամական հարաբերությունները», - ասել է Էրդողանը կառավարության նիստից հետո ազգին ուղղված իր ուղերձում։

Նա հավելել է, որ Թուրքիան ինտենսիվ դիվանագիտական ​​գործունեություն է ծավալել փետրվարի 28-ին Իրանում պատերազմի սկսվելուց ի վեր։

«Մենք բանակցություններ ենք վարել 16 առաջնորդների հետ՝ ճգնաժամից դուրս գալու ելք գտնելու համար», - բացատրել է Էրդողանը։

Պետության ղեկավարը նաև հայտարարել է, թե, իբր, Անկարան «պաշտպանում է արդարությունը, միջազգային իրավունքը, խաղաղությունը և կայունությունը և աջակցում է հակամարտությունների լուծմանը՝ երկխոսության միջոցով»։

«Հակամարտության սկզբից ի վեր բոլոր թուրքական ստորաբաժանումները մարտական ​​պատրաստության վիճակում են։ Մենք մոբիլիզացրել ենք բոլոր պետական ​​ինստիտուտները», - հավելել է թուրք նախագահը։

Նրա խոսքով՝ Իրանի հետ սահմանին գտնվող Թուրքիայի երեք մաքսային անցակետերում խնդիրներ կամ գերբեռնվածություն չկա։ Էրդողանը նշել է, որ Անկարան շուրջօրյա հսկում է իր օդային տարածքը՝ հնարավոր սպառնալիքների հայտնաբերման համար՝։

Էրդողանը նշել է, որ Թուրքիան կշարունակի հետևել զարգացումներին՝ ՆԱՏՕ-ի և այլ դաշնակիցների հետ համակարգված աշխատելով և լրացուցիչ միջոցներ կձեռնարկի իր անվտանգությունն ամրապնդելու համար։