Հրապարակ. «Կոալիցիան չի վհատվում»

«Հրապարակ» օրաթերթն այսօր գրում է. «Չնայած ՀԱԿ-ը բազմիցս հայտարարել է, որ անիմաստ է համարում ՀԱԿ-իշխանություն երկխոսության շարունակությունը, կոալիցիան համարյա կուրորեն հավատում է երկխոսության շարունակմանը։ Երեկ, երբ մեր թղթակիցը դիմել է ՀՀԿ-ի կողմից երկխոսության մասնակից Գագիկ Մինասյանին և փորձել ծանոթանալ արտահերթ ընտրությունների անհրաժեշտության մասին ՀԱԿ-ի ներկայացրած հսկայածավալ փաստաթղթին կոալիցիայի ներկայացրած հակընդդեմ 135 էջանոց հիմնավորումներին, վերջինս հայտարարել է, թե ձևաչափ կա, և իրենք չեն ուզում խախտել այն, քանի որ դեռ հիմնավորումների կեսն են ներկայացրել ՀԱԿ պատվիրակությանը։ Ուստի այն,. թե ինչու, ըստ իշխանության, արտահերթ ընտրություններ չպետք է անցկացվեն ՀՀ-ում, անորոշ ժամանակ գաղտնի է պահվում։ ՀՀԿ ներկայացուցիչը մեծ հավատով ասել է, որ իրենք չեն բացառում առկախված երկխոսության վերսկսումը։ Ամեն դեպքում անհասկանալի է, թե ինչու են կոալիցիայի մշակած փաստաթուղթը գաղտնի պահում։ Ի վերջո՝ ՀԱԿ հարցադրումները հնչել են, և եթե ի պատասխան դրանց իշխանությունն ասելիք ուներ, պետք է վաղուց հրապարակած լիներ»։