Հնդկաստանի պետական բանկը հրաժարվել է սպասարկել ռուսական նավթի վճարումները

Հնդկաստանի խոշորագույն պետական բանկը՝ State Bank of India (SBI)-ն, հրաժարվել է մշակել ռուսական նավթի գնման վճարումները նույնիսկ այն բանից հետո, երբ ԱՄՆ-ը ժամանակավոր թույլտվություն էր տվել Նյու Դելիին շարունակել այդ գնումները։ Այդ մասին հայտնում է Bloomberg գործակալությունը՝ հղում անելով իր աղբյուրներին։

Աղբյուրների տվյալներով՝ բանկը նման որոշում է ընդունել անորոշության պատճառով՝ կապված այն հարցի հետ, թե որքան ժամանակ կգործի Վաշինգտոնի տրամադրած արտոնությունը։ SBI-ում կարծում են, որ ռուսական նավթի համար վճարումներ իրականացնելու դեպքում բանկը կարող է հայտնվել ռիսկային իրավիճակում և վնասել իր միջազգային հեղինակությանը։

Վերլուծաբանների կարծիքով՝ բանկի զգուշավոր մոտեցումը պայմանավորված է նաև ԱՄՆ շուկայում ունեցած մեծ շահերով։ Տարեվերջի տվյալներով՝ SBI-ի միջազգային վարկային պորտֆելի մոտ 26 տոկոսը կապված է ԱՄՆ-ի հետ։ Միաժամանակ ԱՄՆ իշխանությունները հայտարարել են, որ Հնդկաստանին տրամադրված 30-օրյա թույլտվությունը չի նշանակում Վաշինգտոնի քաղաքականության փոփոխություն Ռուսաստանի նկատմամբ։