Կոնդ․ հազարավոր աշխատատեղերի և հարյուրավոր միլիոն դոլարների չկատարված խոստումներ (տեսանյութ)

Կոնդ․ հազարավոր աշխատատեղերի և հարյուրավոր միլիոն դոլարների չկատարված խոստումներ

Փլվող Կոնդ և չկատարված խոստումներ․ ո՞ւր են միլիոնավոր դոլարների ներդրումները: 
Կոնդ թաղամասը Երևանի պերճանքն ու թշվառությունն է։ Նախկինում այստեղ ապրում էին ինչպես մի մեծ ընտանիք, իսկ այսօր այստեղ կողք կողքի հանդիպում են բակի հին ու նոր բնակիչները, ժամանակակից բիզնեսն ու հարյուրամյա կոլորիտային շենքերը՝ հաճախ արդեն փլատակներով։
Ի՞նչ է սա՝ Երևանի սի՞րտ, թե՞ կույրաղիք, ժառանգված գա՞նձ, թե՞ սոցիալական բեռ…
Միգուցե շանս՝ ոմանց համար նոր կյանք սկսելու՝ լրիվ նոր, գետնից բարձր, լուսավոր բնակարանում ապրելու համար, իսկ ոմանց համար՝ գերշահավետ բիզնես։

Անկախ Հայաստանում կառավարած բոլոր իշխանությունների օրոք Կոնդը եղել է օրակարգային հարց։ Խորհրդային տարիներից մինչ օրս Կոնդի վերացումը քննարկվում է։ 

Շատ ու շատ սեփական տներ և նեղ ու խճճված փողոցներ, ըստ պլանի, պիտի քանդվեն, որպեսզի նորացված Երևանի գունապնակին գորշ ու աղքատիկ ստվեր չգցեն, իսկ թաղի հնաբնակ ընտանիքներին, իբրև փոխհատուցում, պիտի առաջարկվի ծանրակշիռ գործարք կամ բնակարաններ՝ տեղում կառուցվող երկնաքերերում։

Բազմաթիվ հանդիպումներ են եղել բնակիչների հետ, տրվել են խոստումներ, կայացել են համաձայնություններ, սակայն սայլը տասնյակ տարիներ շարունակ տեղից չի շարժվել։

Այսօր էլ կարծիքները կիսվում են․ ոմանք համաձայն են փոխշահավետ գործարքի՝ նոր բնակարանի կամ դրամական փոխհատուցման դիմաց լքել իրենց տունն ու հանձնել քանդման։ Որոշներն էլ հուզմունքով են հիշում հին ու բարի Կոնդը և պատրաստ են պայքարել, որպեսզի Հին Երևանից մի կտոր պատմություն պահպանվի։

Նիկոլ Փաշինյանի օրոք Կոնդի վերակառուցման նախագծի շրջանակներում մրցույթ հայտարարվեց դեռևս 2021 թվականին։

Կառավարությունը Կոնդի վերակառուցման ծրագրով խոստանում էր նորացված Երևան, հազարավոր նոր աշխատատեղեր, տնտեսական ու զբոսաշրջային ակտիվություն։ Վստահեցնում էին, որ կգրավվեն հարյուր միլիոնավոր դոլարների ներդրումներ։

Երկու տարի անց՝ 2023 թվականի հուլիսի 17-ին, Տիգրան Ավինյանը վստահ հայտարարեց, թե իբր Կոնդի վերակառուցման նախագիծն անցնում է երկրորդ՝ գործնական փուլին, որի հիմքում, որպես կարևոր խնդիր, դրված է ոչ այլ ինչ, քան բնակիչների տների և հարակից տարածքների սահմանների ճշտման ու սեփականության վկայականների տրամադրման հարցը։ Գաղտնիք չէ, որ այս թաղամասը, երբեմնի Լալայանցի օրինակով, լիուլի ապօրինի բնակեցումներ ու կառուցապատումներ ունի։
Իշխող ուժը իր այս ելույթներով նոր լիցք տվեց Կոնդի սառեցված ծրագրին։ Ներկայացվեց 45 փաթեթ, որից 16-ն անցան հաջորդ փուլ։ Արդյունքում՝ 7 ֆուտուրիստական Կոնդի հայեցակարգային նախագծով այս փուլն ավարտվեց… ու թեման նորից անժամկետ քնեց։ Նկարներն ու անիմացիաները բերեցին, ցույց տվեցին ու տարան…

Արդյունքում՝ նախագծերից ոչ մեկը հետագայում չիրականացվեց։

2024-ին նորից Ավինյանը հիշեց Կոնդի մասին։

Ուղիղ մեկ տարի անց՝ 2025-ի ապրիլի 21-ին, հայտարարվեց, որ Կոնդի նախագծերով մրցույթի հաղթող չի եղել։ Կոնդի վերակառուցման այս մեկնարկից անցել է արդեն 5 տարի։

Օրեր առաջ՝ մարտի 5-ին, Ավինյանի և Կոնդի բնակիչների միջև հերթական հանդիպումը կայացավ։ Ողջ ընթացքում քննարկվում էին միայն սեփականության վկայականների տրամադրման հարցերը։ Իսկ նախագծերը՝  նկարից այն կողմ, կառուցապատողին չհասան։