Իրավաբանը հերքել է վարորդների շրջանում տարածված միֆը՝ տուգանքները չեղարկելու մասին

Իրավաբան Իլյա Ռուսյաևը հայտարարել է, որ վարորդների շրջանում տարածված խորհուրդը՝ տեսախցիկով արձանագրված տուգանքը չեղարկելու համար պարզապես նշել, թե լուսանկարում վարորդի դեմքը չի երևում, իրականում չի գործում։ Նրա խոսքով՝ նման դեպքերում պատասխանատվությունը կրում է ոչ թե ղեկին գտնվող անձը, այլ մեքենայի սեփականատերը, հայտնում է Life.ru-ն։

Մասնագետը նշել է, որ տուգանքը հնարավոր է վիճարկել միայն այն դեպքում, երբ կասկած կա մեքենայի նույնականացման հարցում։ Օրինակ՝ եթե լուսանկարում համարանիշը դժվար է կարդացվում, կամ արձանագրության տվյալները չեն համընկնում նկարում երևացող մեքենայի մակնիշի, գույնի, ժամանակի կամ տեղանքի հետ։

Բացի այդ, տուգանքը կարող է բողոքարկվել, եթե ճանապարհային նշանները կամ գծանշումները սխալ են տեղադրված, բացակայում են կամ ծածկված են այլ առարկաներով։ Նման դեպքերում դա կարող է դառնալ լուրջ փաստարկ բողոք ներկայացնելու համար։

Իրավաբանի խոսքով՝ մեքենայի սեփականատերը կարող է ազատվել պատասխանատվությունից նաև այն դեպքում, եթե ապացուցի, որ մեքենան օգտագործել է այլ անձ կամ այն գողացված է եղել։ Տուգանքի բողոքարկման դիմումը պետք է ներկայացվի տասը օրվա ընթացքում՝ այն ստանալուց հետո՝ համապատասխան մարմնին կամ դատարանին։