Օրմուզի նեղուցը գրեթե փակվել է․ նավերի անցումը նվազել է 97 տոկոսով

Օրմուզի նեղուցով նավերի տարանցումը կտրուկ նվազել է՝ հասնելով գրեթե զրոյի։ ՄԱԿ-ի Առևտրի և զարգացման կոնֆերանսի տվյալներով՝ մարտին նեղուցով անցնող նավերի թիվը նվազել է շուրջ 97 տոկոսով։ Այդ մասին հայտնում է ՏԱՍՍ-ը՝ հղում անելով կազմակերպության զեկույցին։

Եթե փետրվարի 1-ից 27-ը Մերձավոր Արևելքի այս կարևոր ծովային ուղով օրական միջինը անցնում էր մոտ 129 նավ, ապա մարտի 3-ին այդ թիվը կտրուկ ընկել է՝ հասնելով միանիշ ցուցանիշների։ Ներկայումս օրական նեղուցով անցնում է ընդամենը 3-6 նավ, նշում են փորձագետները՝ ընդգծելով, որ իրավիճակը տարածաշրջանում շարունակում է լարված մնալ։

Իրանի իշխանությունները փակել են Օրմուզի նեղուցը՝ ի պատասխան ԱՄՆ-ի և Իսրայելի կողմից իրականացվող լայնածավալ օդային հարվածների։ Արդյունքում խափանվել են Մերձավոր Արևելքից նավթի մատակարարումները, ինչը հանգեցրել է համաշխարհային շուկայում հում նավթի գների կտրուկ աճին։ Իրանի Իսլամական հեղափոխության պահապանների կորպուսի ներկայացուցիչ գեներալ Ալի Մոհամմադ Նաինին հայտարարել է, որ նեղուցի շրջափակումը կշարունակվի այնքան ժամանակ, քանի դեռ չի դադարեցվել Իրանի դեմ ռազմական գործողությունը։