Էրդողանը զգուշացնում է․ Մերձավոր Արևելքը «արյան և վառոդի հոտ» է առնում Իրանի շուրջ հակամարտության պատճառով

Թուրքիայի նախագահ Ռեջեփ Թայիփ Էրդողանը հայտարարել է, որ Իրանի շուրջ ԱՄՆ-ի և Իսրայելի հետ հակամարտության խորացումը Մերձավոր Արևելքում նոր լարվածություն է ստեղծել, և տարածաշրջանը սկսել է «արյան և վառոդի հոտ» առնել։ Այդ մասին հաղորդում է Clash Report-ը՝ փոխանցելով Թուրքիայի առաջնորդի հայտարարությունը։

Էրդողանի խոսքով՝ տարածաշրջանում առաջացած ճգնաժամը կարելի էր լուծել բանակցությունների սեղանի շուրջ, սակայն սխալ հաշվարկները, ոչ ճիշտ գնահատականները և մի շարք սադրանքներ իրավիճակը կրկին հասցրել են վտանգավոր մակարդակի։ Նրա գնահատմամբ՝ այդ զարգացումները Մերձավոր Արևելքը կրկին կանգնեցրել են լայնամասշտաբ բախումների վտանգի առաջ։

Թուրքիայի նախագահը նախկինում նշել էր, որ Անկարան բազմիցս զգուշացրել է Թեհրանին հնարավոր վտանգների մասին, սակայն Իրանը շարունակում է քայլեր, որոնք կարող են վնասել երկրների միջև հարաբերություններին։ Միևնույն ժամանակ Էրդողանը քննադատել է Իսրայելին և ԱՄՆ-ին՝ Իրանի դեմ իրականացված հարձակման համար։ Տարածաշրջանային լարվածության ֆոնին Ռուսաստանի նախագահ Վլադիմիր Պուտինը հեռախոսազրույցներ է անցկացրել Մերձավոր Արևելքի մի շարք առաջնորդների հետ՝ քննարկելով ստեղծված իրավիճակը։