Reuters․ Ճգնաժամի ֆոնին Ճապոնիան բացում է նավթի ռազմավարական պաշարները

Ճապոնիան որոշել է բացել իր ազգային ռազմավարական նավթային պաշարները՝ Մերձավոր Արևելքում ստեղծված լարվածության և Օրմուզի նեղուցի շրջափակման պատճառով առաջացած մատակարարման խնդիրների ֆոնին։ Այդ մասին հայտարարել է երկրի վարչապետ Սանաե Տակաիչին,  հայտնում է Reuters-ը։

Վարչապետի խոսքով՝ նավթի մատակարարումների խափանումները Պարսից ծոցի երկրներից արդեն հանգեցրել են Ճապոնիայում վառելիքի գների կտրուկ աճի։ Նախատեսվում է սկզբում օգտագործել մասնավոր ընկերությունների պահուստները, ինչպես նաև պետական պաշարների մի մասը։ Մասնավոր պահուստները, ըստ գնահատականների, կբավարարեն մոտ 15 օր, իսկ պետական պաշարները՝ մոտ մեկ ամիս։

Ընդհանուր առմամբ Ճապոնիայի ռազմավարական նավթային պաշարները կարող են ապահովել երկրի պահանջարկը մոտ 254 օր։ Միևնույն ժամանակ դեռ մարտի 9-ին կառավարության գլխավոր քարտուղար Մինորու Կիհարան հայտարարել էր, որ կառավարությունը այդ պահին չի նախատեսում բացել նավթային պահուստները, քանի որ Մերձավոր Արևելքում լարվածության ազդեցությունը էներգետիկ իրավիճակի վրա դեռ լիովին գնահատված չէր։