Ռուսաստանը սպառնացել է ոչնչացնել Բրյանսկի հարվածին մասնակցած ուկրաինական զորամասը

Ռուսաստանի Պետդումայի պաշտպանության հանձնաժողովի անդամ Անդրեյ Կոլեսնիկը հայտարարել է, որ Ուկրաինայի զինված ուժերի այն ստորաբաժանումը, որը մասնակցել է Բրյանսկի վրա իրականացված հրթիռային հարվածին, կարող է ամբողջությամբ ոչնչացվել։ Այս մասին պատգամավորը հայտնել է «Լենտա.ռու»-ին տված մեկնաբանության մեջ։

Խոսքը վերաբերում է Ուկրաինայի զինված ուժերի անօդաչու համակարգերի ուժերի 413-րդ «Ռեյդ» գնդին, որի ներկայացուցիչները ավելի վաղ հայտարարել էին, որ մասնակցել են Բրյանսկի ուղղությամբ իրականացված գործողությանը։ Գնդի մամուլի ծառայության տվյալներով՝ ստորաբաժանման անօդաչու սարքերի օպերատորները իրականացրել են թիրախների օդային հետախուզություն, որոնց վրա հետագայում հասցվել է հրթիռային հարված։

413-րդ գունդը ստեղծվել է 2024 թվականի սեպտեմբերին։ 2024-2025 թվականներին այն մասնակցել է մարտական գործողություններին Կուրսկի մարզում, այնուհետև տեղափոխվել է Դոնեցկի մարզի հարավային հատված։ Հիշեցնենք, որ Բրյանսկի վրա Ուկրաինայի հրթիռային հարվածի մասին հայտնի դարձավ մարտի 10-ին, որի հետևանքով, ըստ ռուսական կողմի, տուժել է առնվազն 42 մարդ, իսկ 6 մարդ զոհվել է։ Մարզի նահանգապետ Ալեքսանդր Բոգոմազը հայտարարել էր, որ հարձակման ընթացքում կիրառվել են բրիտանական Storm Shadow հրթիռներ։