Ռուս վերլուծաբանը հայտարարել է․ Բրյանսկի վրա Storm Shadow հրթիռներով հարվածը «ցուցադրական» էր

Ռուս ռազմական լրագրող Ալեքսանդր Կոցը հայտարարել է, որ Ուկրաինայի զինված ուժերի կողմից Բրյանսկի վրա Storm Shadow հրթիռներով իրականացված հարվածը ցուցադրական բնույթ է կրել։ Նրա խոսքով՝ հարձակումը կատարվել է ցերեկային ժամերին՝ հատուկ մեդիա ազդեցություն ստեղծելու նպատակով։ Այդ մասին հայտնում են ռուսական լրատվամիջոցները։

Կոցի գնահատմամբ՝ հարվածի հիմնական նպատակը տեղեկատվական ազդեցությունն էր։ Նրա խոսքով՝ հարձակման ընթացքում երկնքում հայտնվել էր նաև ուկրաինական հետախուզական անօդաչու սարք, որը ֆիքսել է հրթիռների հարվածները։ Այդ կադրերը, ըստ լրագրողի, հետագայում լայնորեն տարածվել են սոցիալական ցանցերում՝ տարբեր տեսանկյուններից նկարահանված տեսանյութերով։

Հիշեցնենք, որ Բրյանսկի վրա հրթիռային հարձակումը տեղի է ունեցել մարտի 10-ին։ Քաղաքի ուղղությամբ արձակվել էր մի քանի հրթիռ, որոնց հետևանքով տուժել է առնվազն 42 մարդ, իսկ 6 մարդ զոհվել է։ Ռուսաստանի նախագահի մամուլի քարտուղար Դմիտրի Պեսկովը հայտարարել է, որ նման հարվածների կանխման համար Ռուսաստանը պետք է հասնի հաղթանակի ռազմական գործողություններում։