Օմանի ափերի մոտ թաիլանդական դրոշի ներքո գտնվող առևտրային նավ է վթարի ենթարկվել

Թաիլանդի դրոշի ներքո նավարկող MAYUREE NAREE առևտրային նավը բախվել է Օմանի ափերի մոտ։ Օմանի ONA լրատվական գործակալության հաղորդմամբ՝ նավի վրա հրդեհ է բռնկվել, և անձնակազմը տարհանվել է։

Գործակալության հաղորդմամբ՝ Օմանի թագավորական նավատորմը տարհանել է 20 թաիլանդցի քաղաքացիների։ Անձնակազմը տարբեր աստիճանի վնասվածքներ է ստացել։

Թաիլանդի ծովային դեպարտամենտը հայտնել է, որ Հորմուզի նեղուցով անցնելիս նավը վնասվել է պայթյունի հետևանքով, և անձնակազմի երեք անդամ անհետ կորած են համարվում։

«Ծովային դեպարտամենտը հաղորդագրություն է ստացել մարտի 11-ին Հորմուզի նեղուցով տարանցիկ թաիլանդական Mayuree Naree բեռնատար նավի ետնամասում տեղի ունեցած պայթյունի մասին: Նավի սեփականատիրոջ խոսքով՝ նավի վրա եղել է անձնակազմի 23 անդամ: Պայթյունը հրդեհ է առաջացրել շարժիչի սենյակում: Նավապետը որոշել է լքել նավը և անձնակազմին տարհանել փրկարար նավակներ: Անձնակազմի քսան անդամ անվտանգ տեղափոխվել է Օմանի Խասաբ նավահանգիստ: Անձնակազմի երեք անդամ անհետ կորած են համարվում. ենթադրվում է, որ միջադեպի պահին նրանք գտնվել են նավի շարժիչի սենյակում: Ներկայումս որոնողական-փրկարարական գործողություն է ընթանում», - ասվում է հայտարարության մեջ: