Հետազոտություն․ քաշի նվազեցման «Վեգովի» դեղամիջոցը կարող է բարձրացնել տեսողության կորստի վտանգը

Քաշի նվազեցման համար լայնորեն կիրառվող «Վեգովի» դեղամիջոցը, որը պարունակում է սեմագլուտիդ, կարող է կապված լինել հազվադեպ, բայց լուրջ բարդության՝ իշեմիկ օպտիկական նյարդաբորբի հետ, որը երբեմն անվանում են «աչքի ինսուլտ»։ Այս եզրակացությանն են եկել գիտնականները՝ ուսումնասիրելով դեղամիջոցների կողմնակի ազդեցությունների մասին տվյալները։ Հետազոտությունը հրապարակվել է British Journal of Ophthalmology (BJO) գիտական հանդեսում։

Իշեմիկ օպտիկական նյարդաբորբը առաջանում է տեսողական նյարդի արյան մատակարարման խանգարման հետևանքով և կարող է հանգեցնել հանկարծակի տեսողության կորստի։ Գիտնականները վերլուծել են ԱՄՆ Սննդի և դեղերի վարչության (FDA) կողմնակի ազդեցությունների բազայի տվյալները 2017-ից մինչև 2024 թվականները։ Ավելի քան 30 միլիոն հաղորդագրություններից շուրջ 31 հազարն առնչվել են սեմագլուտիդ պարունակող դեղամիջոցներին։

Վերլուծությունը ցույց է տվել, որ հենց «Վեգովի» դեղամիջոցն է առավել հաճախ կապվում այդ բարդության հետ։ Ըստ հետազոտության՝ նման բարդության առաջացման հավանականությունը գրեթե հինգ անգամ բարձր է, քան նույն ակտիվ նյութը պարունակող մեկ այլ դեղամիջոցի՝ «Օզեմպիկի» օգտագործման դեպքում։ Միևնույն ժամանակ տղամարդկանց մոտ այդ ռիսկը ավելի քան երեք անգամ բարձր է, քան կանանց մոտ։ Գիտնականները նշում են, որ տվյալները դեռ չեն ապացուցում ուղիղ պատճառահետևանքային կապ, սակայն արդյունքները պահանջում են լրացուցիչ ուսումնասիրություններ և ավելի ուշադիր վերահսկում այն հիվանդների նկատմամբ, որոնք ընդունում են ճարպակալման բուժման դեղամիջոցներ։