Ռումինիան թույլ է տվել ԱՄՆ-ին իր տարածքում տեղակայել զորքեր՝ Իրանի դեմ գործողության համար

Ռումինիան համաձայնել է թույլ տալ Միացյալ Նահանգներին ժամանակավորապես տեղակայել ամերիկյան ռազմական ուժեր իր տարածքում՝ Իրանի դեմ իրականացվող գործողություններին աջակցելու նպատակով։ Այդ մասին հայտարարել է երկրի նախագահ Նիկուշոր Դանը, փոխանցում է Reuters գործակալությունը։

Նրա խոսքով՝ ԱՄՆ-ի ռազմական գործողությունների ընթացքում ամերիկյան օդային լիցքավորման ինքնաթիռները, մոնիթորինգի սարքավորումները և արբանյակային կապի համակարգերը կարող են օգտագործել Ռումինիայում գտնվող Միխայիլ Կոգըլնիչանու ավիաբազան։ Նախագահը նշել է, որ այդ տեխնիկայի և զինծառայողների տեղակայման համար անհրաժեշտ է նաև Ռումինիայի խորհրդարանի հաստատումը, որի համար համապատասխան առաջարկ արդեն ուղարկվել է օրենսդիր մարմին։

Դանի գնահատմամբ՝ ամերիկյան ռազմական տեխնիկայի և զինծառայողների ժամանակավոր տեղակայումը կուժեղացնի Ռումինիայի անվտանգությունը։ Ավելի վաղ Bloomberg գործակալությունը հաղորդել էր, որ ԱՄՆ-ը կարող է մինչև 500 զինծառայող ուղարկել Ռումինիա՝ Մերձավոր Արևելքում իրականացվող գործողություններին աջակցելու համար։