Բժիշկը խոսել է Լերչեկի ծանր ախտորոշման մասին․ քաղցկեղը կարող էր երկար ժամանակ չնկատվել

Ռուսաստանցի բժիշկ-ուռուցքաբան Եվգենի Չերեմուշկինը մեկնաբանել է բլոգեր Վալերիա Չեկալինայի՝ հայտնի որպես Լերչեկ, ախտորոշումը։ Նրա խոսքով՝ ստամոքսի քաղցկեղը կարող էր երկար ժամանակ չնկատվել, քանի որ հիվանդությունը հաճախ սկզբնական փուլերում չի ունենում ակնհայտ ախտանիշներ։ Այդ մասին գրում է Life.ru-ն։

Մասնագետի խոսքով՝ քաղցկեղի չորրորդ փուլում հիվանդության ամբողջական բուժումը գրեթե անհնար է, սակայն ժամանակակից բժշկական մեթոդները թույլ են տալիս վերահսկել հիվանդության ընթացքը, թեթևացնել ախտանիշները և բարելավել հիվանդի կյանքի որակը։ Բժիշկը նշել է նաև, որ վաղ փուլում հիվանդությունը կարող էր չհայտնաբերվել ախտանիշների բացակայության պատճառով։

Չերեմուշկինը հավելել է, որ բլոգերը հղի էր, ինչը կարող էր բարդացնել լիարժեք բժշկական հետազոտությունների անցկացումը։ Բացի այդ, հորմոնալ փոփոխությունները, ըստ բժշկի, կարող էին արագացնել ուռուցքի զարգացումը։ Ավելի վաղ հաղորդվել էր, որ Լերչեկի մոտ հայտնաբերվել է ստամոքսի քաղցկեղ՝ թոքերի մետաստազներով։