Հետազոտություն․ որոշ ձայների հանդեպ գերզգայունությունը կարող է կապված լինել հոգեկան խանգարումների ռիսկի հետ

Ամերիկացի գիտնականները պարզել են, որ միզոֆոնիան՝ որոշակի ձայների նկատմամբ ցավոտ կամ ուժեղ բացասական արձագանքը, կարող է կապված լինել հոգեկան խանգարումների բարձր ռիսկի հետ։ Միզոֆոնիա ունեցող մարդիկ հաճախ դժվար են տանում այնպիսի ձայներ, ինչպիսիք են ծամելը, կուլ տալը կամ շնչառական ձայները։ Հետազոտության արդյունքները հրապարակվել են Psychiatry Research գիտական հանդեսում։

Գիտնականները ուսումնասիրել են 185 մարդ, ովքեր տառապում էին միզոֆոնիայով, և համեմատել նրանց 1644 մարդու հետ, որոնք նման խնդիր չունեին։ Պարզվել է, որ միզոֆոնիա ունեցող մարդկանց մոտ զգալիորեն ավելի հաճախ են հանդիպում անհանգստության և դեպրեսիայի ախտանիշներ, ինչպես նաև նախկինում ախտորոշված հոգեկան հիվանդություններ։ Մասնակիցների մոտ մոտ 65 տոկոսը նշել է, որ կյանքի ընթացքում առնվազն մեկ անգամ ունեցել է հոգեկան խանգարման ախտորոշում։

Հետազոտության համաձայն՝ առավել հաճախ հանդիպել են դեպրեսիան (48,9%) և անհանգստային խանգարումները (46,7%)։ Բացի այդ, միզոֆոնիա ունեցող մարդկանց մոտ ավելի հաճախ են արձանագրվել հետտրավմատիկ սթրեսային խանգարում, օբսեսիվ-կոմպուլսիվ խանգարում, սննդային խանգարումներ և ուշադրության դեֆիցիտի համախտանիշ։ Գիտնականները նշում են, որ ուսումնասիրությունը դեռ չի ապացուցում ուղղակի պատճառահետևանքային կապ, սակայն միզոֆոնիան կարող է լինել հոգեկան և զգայական խնդիրների նկատմամբ բարձր խոցելիության կարևոր ցուցիչ։