Որքան ժամանակ կպահանջվի նավթային ճգնաժամը լուծելու համար․ ԶԼՄ

Պարսից ծոցից նավթի արտահանման բնականոն մակարդակին վերադառնալու համար կարող են ամիսներ պահանջվել ԱՄՆ-ի, Իսրայելի և Իրանի միջև պատերազմի ավարտից հետո։ Այս մասին գրում է Bloomberg-ը՝ հղում անելով աղբյուրներին։

«Իրավիճակին ծանոթ աղբյուրների համաձայն՝ Պարսից ծոցի նավթի արտահանման բնականոն մակարդակին վերադառնալու համար կարող են ամիսներ պահանջվել մարտական ​​գործողությունների ավարտից հետո։ Մատակարարումների վերսկսումը կհետաձգվի, եթե Իրանը կամ նրա միջնորդները փորձեն խափանել նավագնացության ուղիները Թրամփի հաղթանակը հռչակելուց հետո», - գրում է Bloomberg-ը։

Հրապարակումը նաև նշում է, որ ԱՄՆ-ի՝ Հորմուզի նեղուցը վերաբացելու առաջարկները «չեն համոզել» Պարսից ծոցի որոշ պետությունների։ Նույնիսկ եթե նավատերերը և ապահովագրողները համաձայնեն թույլատրել իրենց տանկերների անցումը նեղուցով, նրանք դեռևս դժվարություններ կունենան անձնակազմ հավաքագրելու հարցում, մինչև Իրանի հրթիռային և անօդաչու թռչող սարքերի հարձակումները չդադարեն։