Հայաստանը հրաժարվել է հաստատել Ռուսաստանի կողմից ԼՂ-ից տեղահանված անձանց համար մարդասիրական օգնության խմբաքանակի մատակարարումը․ Զախարովա

Ռուսաստանի արտաքին գործերի նախարարության խոսնակ Մարիա Զախարովան ճեպազրույցի ժամանակ հայտարարել է, որ Հայաստանը հրաժարվել է հաստատել Ռուսաստանի կողմից Լեռնային Ղարաբաղից տեղահանված անձանց համար մարդասիրական օգնության հերթական խմբաքանակի մատակարարումը։

«Հենց այսօր մենք նկատեցինք, որ որոշ հաղորդագրություններ են հայտնվել այն մասին, որ պաշտոնական Երևանը մերժել է ռուսական կողմի նախաձեռնությունը՝ մարդասիրական օգնություն ցուցաբերել Ղարաբաղից ներքին տեղահանված անձանց։ Մենք արդեն ստացել ենք հարցեր՝ սա հաստատելու, հերքելու, որպեսզի ենթադրություններ չլինեն, մենք, անկեղծ ասած, չէինք պատրաստվում հրապարակայնորեն մեկնաբանել այս ամենը, բայց հաշվի առնելով, որ հարցեր կային, ես ավելի մանրամասն կանդրադառնամ այս թեմային», - նշել է Զախարովան։ 

«Ռուսաստանը երբեք չի թողել նշված մարդկանց, նշված տարածաշրջանին առանց օգնության և աջակցության։ Մոսկվան երբեք անտարբեր չի եղել Հայաստանում ապրող ղարաբաղցիների ճակատագրի նկատմամբ։ Մոսկվան առաջիններից մեկն էր, որ մարդասիրական օգնություն ուղարկեց հանրապետություն։ Չնայած այն ժամանակ էլ, ինչ-ինչ պատճառներով, Երևանը այդքան էլ գոհ չէր ռուսական կողմի օգնությունից։ Բանը հասավ նրան, որ պաշտոնական խողովակներով հայտարարվեց՝ կարծում եմ՝ դուք նույնպես հիշում եք՝ «շնորհակալություն, անհրաժեշտ չէ»։ Եվ հիմա կա նոր մերժում»,– նշել է ՌԴ ԱԳՆ ներկայացուցիչը։ 

Զախարովան հավելել է, որ «Երևանի կողմից հետագա օգնություն տրամադրելու մերժումը, հավանաբար, հասկանալի կլիներ, եթե օգնությունն այլևս անհրաժեշտ չլիներ»։ «Կարծում եմ, որ, ակնհայտորեն, ռուսական կողմը չէր առաջարկի այս օգնությունը, եթե դրա նկատմամբ պահանջարկ չլիներ։ Եկեք նայենք փաստերին. նման օգնության համար Հայաստանի քաղաքացիներից ստացված խնդրանքների թիվը միայն աճել է», - հայտարարել է նա։