Չինաստանը խիստ դատապարտել է Իրանում աղջիկների դպրոցի վրա հարվածը

Չինաստանը դատապարտել է Իրանի Մինաբ քաղաքում գտնվող աղջիկների դպրոցի վրա իրականացված հրթիռային հարվածը՝ այն անվանելով մարդկային բարոյականության կոպիտ խախտում։ Այդ մասին հայտարարել է Չինաստանի ԱԳՆ պաշտոնական ներկայացուցիչ Գո Ցզյակունը, հաղորդում է «ՌԻԱ Նովոստի»-ն։

Չինացի դիվանագետը նշել է, որ Պեկինը դատապարտում է քաղաքացիական բնակչության և ոչ ռազմական օբյեկտների դեմ իրականացվող բոլոր չընտրովի հարձակումները։ Նրա խոսքով՝ դպրոցների վրա հարվածները, որոնք վնաս են պատճառում երեխաներին, միջազգային մարդասիրական իրավունքի ավելի լուրջ խախտում են և անցնում են մարդկային բարոյականության ու խղճի սահմանները։

Իրանում տարրական դպրոցի վրա հարձակումը տեղի էր ունեցել փետրվարի 28-ին։ ԱՄՆ պաշտպանության նախարար Փիթ Հեգսեթը, պատասխանելով հարվածին Վաշինգտոնի հնարավոր մասնակցության վերաբերյալ հարցին, հայտարարել էր, որ ԱՄՆ-ը հետաքննություն է անցկացնում՝ միաժամանակ ընդգծելով, որ ամերիկյան զինված ուժերը երբեք չեն թիրախավորում քաղաքացիական օբյեկտները։ Ավելի ուշ Ռուսաստանի նախագահ Վլադիմիր Պուտինը և Իրանի նախագահ Մասուդ Փեզեշքիանը քննարկել են Մերձավոր Արևելքում ստեղծված իրավիճակը՝ ընդգծելով լարվածության հնարավորինս արագ նվազեցման անհրաժեշտությունը։