Գիտնականները բացահայտել են արագ ծերացման անսպասելի պատճառը

Բարդ և մշտապես խնդիրներ ստեղծող մարդկանց հետ շփումը կարող է արագացնել մարդու կենսաբանական ծերացումը։ Այդ մասին հայտարարել են Նյու Յորքի համալսարանի սոցիոլոգիայի դոցենտ Բենկյու Լին և սոցիոլոգիայի պրոֆեսոր Բրեա Փերին՝ ներկայացնելով իրենց հետազոտության արդյունքները The Washington Post-ին։

Գիտնականները ուսումնասիրել են ավելի քան 2000 մեծահասակների տվյալներ և պարզել, որ նույնիսկ մեկ «դժվար մարդու» ներկայությունը շրջապատում կարող է ծերացման տեմպը բարձրացնել մոտ 1.5 տոկոսով։ Սա նշանակում է, որ մեկ օրացուցային տարվա ընթացքում մարդու օրգանիզմը կարող է ծերանալ ոչ թե մեկ, այլ մոտ 1.015 կենսաբանական տարիով, և նման փոքր տարբերությունները ժամանակի ընթացքում կուտակվում են։

Հետազոտության համաձայն՝ «դժվար մարդիկ» հիմնականում այն անձինք են, որոնք հաճախ լարվածություն են ստեղծում կամ բարդացնում շրջապատի կյանքը՝ օրինակ՝ հարազատներ, գործընկերներ կամ հարևաններ, որոնց հետ մարդիկ ստիպված են մշտապես շփվել։ Մասնագետները նշում են, որ նման շփումները հատկապես ուժեղ ազդեցություն կարող են ունենալ կանանց և թույլ առողջություն ունեցող մարդկանց վրա, ու խորհուրդ են տալիս հնարավորության դեպքում սահմանափակել մշտական սթրես առաջացնող կապերը և ավելի շատ շփվել դրական մարդկանց հետ։