Մի շարք սննդամթերքներ էժանացել են. ամենաշատը նվազել են թեյի և հնդկացորենի գները. ՌԴ

Ռուսաստանում փետրվարին մանրածախ առևտրային ցանցերը նվազեցրել են սոցիալական նշանակություն ունեցող մի շարք սննդամթերքների գները։ Ըստ Օմնիչանելային մանրածախ առևտրի ընկերությունների ասոցիացիայի (ԱԿՈՐՏ) տվյալների՝ փետրվարին նման ապրանքների մանրածախ գները նվազել են միջինում 1.3 տոկոսով՝ հունվարի համեմատ, հաղորդում է ՏԱՍՍ-ը։

Ամենաշատը էժանացել են սև թեյն ու հնդկացորենը․ դրանց գները նվազել են համապատասխանաբար 9.5 և 7.2 տոկոսով։ Բացի այդ, մոտ 3.8 տոկոսով նվազել է բրոյլեր հավի մսի գինը, իսկ կարագն ու արևածաղկի յուղը էժանացել են համապատասխանաբար 1.9 և 1.5 տոկոսով։ Մոտ 1.3 տոկոսով նվազել է նաև գառան մսի արժեքը։

Տարեկան հաշվարկով ևս սոցիալական նշանակություն ունեցող մի շարք ապրանքներ զգալիորեն էժանացել են։ Ամենամեծ նվազումը գրանցվել է բրնձի, սպիտակ կաղամբի, կարտոֆիլի, աղի, կարագի, սոխի և հավի ձվի դեպքում։ Մասնավորապես՝ բրնձի նվազագույն մանրածախ գինը մեկ տարվա ընթացքում նվազել է մոտ 39 տոկոսով, սպիտակ կաղամբինը՝ 35 տոկոսով, իսկ կարտոֆիլինը՝ շուրջ 28 տոկոսով։ Միևնույն ժամանակ փորձագետները նախազգուշացնում են, որ Իրանի կողմից Օրմուզի նեղուցի երկարատև փակման դեպքում սննդամթերքի գները կարող են աճել ամբողջ աշխարհում։