Ռուսաստանում թույլ կտան ինքնաթիռ տանել ավելի քան 100 մլ մանկական սնունդ

Ռուսաստանում նախատեսվում է թույլատրել ինքնաթիռների ուղևորներին ձեռքի ուղեբեռով տանել ավելի քան 100 միլիլիտր կրծքի կաթ կամ մանկական սնունդ։ Այդ մասին հայտնում է «ՌԻԱ Նովոստի»-ն՝ հղում անելով Ռուսաստանի տրանսպորտի նախարարությանը։

Նշվում է, որ մինչ այժմ գործող կանոնակարգի համաձայն՝ ինքնաթիռ կարելի էր վերցնել միայն մինչև 100 միլիլիտր տարողությամբ հեղուկներ։ Թեև որոշ ավիաընկերություններ գործնականում թույլ էին տալիս մանկական սնունդ տեղափոխել ավելի մեծ քանակով, դա հակասում էր նախարարության գործող կանոններին։

Նոր փոփոխությունների համաձայն՝ կանոնակարգը կճշգրտվի այնպես, որ երեխաների սնունդը հնարավոր լինի տեղափոխել ավելի մեծ տարաներով և այն քանակով, որը անհրաժեշտ է թռիչքի ընթացքում։ Փոփոխությունը քննարկման փուլում է և անցնում է պաշտոնական համաձայնեցման գործընթաց։ Ավելի վաղ Իրկուտսկի օդանավակայանում տեղի ունեցած դեպքից հետո, երբ աշխատակիցը ուղևորուհուց վերցրել էր մանկական սնունդը և կաթը, տրանսպորտային դատախազությունը սկսել էր ստուգում։