Goldman Sachs-ը կանխատեսում է նավթի գնի կտրուկ աճ մինչև 145 դոլար

Եթե Մերձավոր Արևելքում իրավիճակը զարգանա ամենաբացասական սցենարով, համաշխարհային շուկայում Brent տեսակի նավթի գինը կարող է հասնել միջինում 145 դոլարի մեկ բարելի համար։ Այդ մասին գրում է The Wall Street Journal-ը՝ հղում անելով ներդրումային խոշոր բանկ Goldman Sachs-ի կանխատեսմանը։

Փորձագետների կարծիքով՝ շուկայի լարվածության հիմնական պատճառներից մեկը Օրմուզի նեղուցի հնարավոր փակման վտանգն է, որը կարող է սահմանափակել նավթի մատակարարումները։ Մինչ վերջին իրադարձությունները այդ նեղուցով էր անցնում համաշխարհային նավթային առևտրի մոտ մեկ երրորդը։ Sparta Commodities ընկերության վերլուծաբան Նիլ Քրոսբին նշել է, որ շուկան արդեն արձագանքում է մատակարարումների կրճատման ռիսկին։

Լարվածությունը աճում է նաև Մերձավոր Արևելքում էներգետիկ ենթակառուցվածքների դեմ հարձակումների պատճառով։ Մասնավորապես վնասվել է Qatar Energy ընկերության գործարանը Ռաս Լաֆան քաղաքում, ինչպես նաև հարվածների են ենթարկվել Օրմուզի նեղուցում գտնվող մի շարք նավթատար տանկերներ։ Այս ֆոնին նավթի գինը արդեն հասել է 119 դոլարի մեկ բարելի համար, իսկ ներկայում կայունացել է մոտ 100 դոլարի մակարդակում։ Վերլուծաբանները զգուշացնում են, որ հակամարտության երկարաձգման դեպքում աշխարհը կարող է կանգնել նոր էներգետիկ ճգնաժամի առաջ։