Ռուսաստանում չեն բացառում նավթի գնի կտրուկ աճը

Ռուսաստանի Պետդումայի ֆինանսական շուկայի հանձնաժողովի ղեկավար Անատոլի Ակսակովը հայտարարել է, որ նավթի գինը կարող է աճել նույնիսկ երկու-երեք անգամ։ Նրա խոսքով՝ ներկայումս շուկան պահվում է այն պաշարների հաշվին, որոնք կուտակվել էին մինչև Իրանի դեմ ԱՄՆ-ի և Իսրայելի հարվածները և դրան հաջորդած Օրմուզի նեղուցով մատակարարումների սահմանափակումը։

Ակսակովի գնահատմամբ՝ երբ այդ պաշարները սպառվեն, նավթի գինը կարող է կտրուկ բարձրանալ՝ մի քանի անգամ գերազանցելով իրանական ճգնաժամից առաջ եղած մակարդակը։ Վերջին շաբաթվա ընթացքում նավթի գինը արդեն երկու անգամ գերազանցել է 100 դոլարը մեկ բարելի դիմաց։

Մատակարարումների խնդիրների ֆոնին արևմտյան երկրները, այդ թվում ԱՄՆ-ը, ստիպված են եղել օգտագործել իրենց նավթային պահուստները՝ շուկան կայունացնելու համար։ Մինչդեռ Goldman Sachs ներդրումային բանկի վերլուծաբանները չեն բացառել, որ եթե Մերձավոր Արևելքից մատակարարումները չվերականգնվեն մինչև մարտի վերջ, նավթի գները կարող են կրկին հասնել 2008 թվականի ռեկորդային մակարդակներին՝ մոտ 147 դոլար մեկ բարելի դիմաց։