Իմ անունը հայտնվել է թեկնածուների ցանկում առանց իմ թույլտվության․ Բրյունետ

 Երգչուհիներ Իվետա Մուկուչյանը և Բրյունետը հանդես են եկել հայտարարություններով՝ պարզաբանելով «Խազեր» երաժշտական մրցանակաբաշխությանը իրենց չմասնակցելու որոշումը։

Բրյունետը հայտնել է, որ այսուհետ մտադիր չէ մասնակցել որևէ մրցանակաբաշխության։ Նա շեշտել է, որ իր համար առաջնայինը լսարանի սերն ու գնահատականն է, այլ ոչ թե պաշտոնական տիտղոսները։

«Ես այս տարի և այսուհետ չեմ մասնակցում ոչ մի մրցանակաբաշխության։ Իմ անունը հայտնվել է թեկնածուների ցանկում առանց իմ թույլտվության։ Միակ ճանաչումը, որն ինձ համար իսկապես կարևոր է, դա դուք եք՝ մարդիկ, ովքեր լսում են իմ երաժշտությունը, երգում այն, և պահում իրենց սրտերում։ Դուք եք իմ իրական մրցանակը»,- գրել է երգչուհին։

Իվետա Մուկուչյանն իր հերթին պարզաբանել է, որ ինքն ու իր թիմը բազմիցս տեղեկացրել են կազմակերպիչներին մրցանակաբաշխությանը չմասնակցելու մասին, սակայն իր որոշումն անտեսվել է։

«Ես «Խազեր» մրցանակաբաշխությանը չմասնակցելու հստակ որոշում ունեմ, որի մասին ես ու իմ թիմը բազմիցս հայտնել ենք կազմակերպիչներին՝ թե բանավոր, թե թե գրավոր ձևով։ Ավելին՝ հստակեցրել եմ և պահանջել, որ իմ անուն-ազգանունը չօգտագործվի որևէ անվանակարգում կամ դրան վերաբերող արշավներին։ Շարունակելու եմ աշխատել՝ նվիրված ժողովրդին, իսկ գնահատականը ստանում եմ իմ լսարանից և երկրպագուներից, որոնց հետ հարաբերություններն ամենաամուրն ու առողջն են՝ արդեն տարիներ շարունակ։ Հույս ունեի, որ կազմակերպիչները նույն հարգանքով կմոտենային իմ որոշմանը, որը ցավոք, անտեսվել է», - գրել է Իվետան։

 Նշենք, որ «Խազեր» հայկական երաժշտական մրցանակաբաշխությունը տեղի կունենա մարտի 29-ին Կարեն Դեմիրճյանի անվան մարզահամերգային համալիրում։

Այն Հայկական ազգային երաժշտական ակադեմիայի կողմից անցկացված ամենամյա երաժշտական մրցանակաբաշխություն է։